ကျနော်ရောက်လားရေခါ
ဂျိုဟိုးစွာ ကျားသစ်တစ်ကောင်ပိုင် ဖစင်းဝပ်နိန်ရေ
ဒုက္ခသည် အကျီ င်္ကိုဝတ်ဆင်လို့ ငါ့သွီးသားတိ
ရီသစ်မြီသစ်ကို တိုးထွက်လာကတ်တေ ကာလာစုံငှက်တိ
မျက်စီတစ်ဆုံး ကွင်းပြင်ထဲ
အစားအစာ တူးဆွ ရှာဖွီစားသောက်လို့ ။
ဂျိုဟိုးစွာ မဟာသီယာမက်တေ အိပ်မက်တစ်ခု
ဂျိုဟိုးစွာ စင်္ကာပူကျွန်းကို မှီထားရေ ခေါင်းအုန်းတစ်လုံး
ဂျိုဟိုးစွာ မလေးရှားနိူင်ငံက ပါးစပ်ပေါက် တစ်ပေါက်လည်းဖြစ်တေ။
ဟာလာလုပ်ပြီးသား ထမင်းဆိုင်တစ်ဆိုင်မှာထိုင်ယင်း
ခေါင်းမြီချုံထားရေ ပန်းတိကို ငေးမူ
ရာသီစက်ဝန်းက
အဆိပ်ပြင်းရေ မြွှီစိမ်းရနံ့ 
မိစ္ဆာမျက်ဝန်းတိ မိုးသားပိုင်ပြိုဆင်းလာကတ်ယင့်။
ဂျိုဟိုးမှာ မဆိတ်သသောနန့်  ဗိုင်းရပ်၊ ဘက်တီးရီးယားတိ မကန်တွိခရေ
ဂျိုဟိုးမှာ ကိုယ့်မျက်ရည်ကို ကိုယ်သောက်လို့ ပြည်ထောင်စု သမချေတိ မကန်တွိခရေ
ဂျိုဟိုးမှာ ကတီပါဖိနပ်စီး၊ သနပ်ခါးလိမ်း၊ ခတောင်းဝပ်ပနာ မျိုးချစ် ပြည်ချစ်တိလည်း ဇာချားတွိခရေ
ဂျိုဟိုးစွာ ဝက်သားရောင်းနိန်ရေ မလေးသျှားးနိူင်ငံသားတစ်ယောက်
ဂျိုဟိုးစွာ ချမ်းသာနိန်ရေ တရုတ်တမိသား
ဂျိုဟိုးမှာ အိမ်ထောင်ကျနိန်ရေ ငယ်သူငယ်ချင်း တစ်ယောက်လည်း တွိခရေ။
ငါ ဂျိုဟိုးကို ရောက်လားရေခါ
ဂျိုးဟိုးစွာ စင်္ကာပူကို လာအလုပ်လုပ်နိန်ရေ မလေးတစ်ယောက်
တတိယနိူင်ငံကို လားဖို့ တန်းစီနိန်ရေ ရခိုင်တော်လှန်ရေးသမားတစ်ဦး
အသားအရီကို ဗန်းပြပနာ ဂိုဏ်းစတားလုပ်စားနိန်ရေ မှင်းဂျိုင်သီးကုလားတစ်ကောင်
မြန်မာပြည်စစ်အုပ်ချုပ်ရေးကြောင့် ဘဝတိ ညညက်ကြီပနာ ကုလားလက်ထဲမှာ ရောက်နိန်ရရေ ဗုဒ္ဓဘာသာမမ့ချေ တစ်ယောက်
အိမ်ပေါင်၊ ယာပေါင်၊ အုန်းခင်းတိပေါင်လို့ 
ကျီးလန့် စာစား ရုန်းကန်နိန်ကတ်ရရေ မြန်မာတိုင်းရင်းသား တရွီ
ဂျိုဟိုးစွာ ရင်းဂစ် အသစ်စက်စက်တိနန့် ငါ့ကိုကြိုဆိုနိန်ရေ
ဂျိုဟိုးစွာ အရှိအာရှက ဖစင်းဝပ်ပနာသန်းရှာနိန်ရေ ကျားသစ်တစ်ကောင်
ငါ့ ယင်းသူ့ နောက်ကုန်းကို နောက်ဆုံး နင်းမိရေခါ
ဂျိုဟိုးစွာ ငါ့ကိုသွားခြဲပြ
နောက်တစ်ခေါက် ပြန်လာလည်ဖို့ အတွက်
သူ့ ပုံတူ နှလုံးသားတစ်စုံကိုလည်း လက်ဆောင်ပီးလိုက်လီရေ။
ခိုင်ရမ္မာ(၀၇.၀၆.၂၀၁၃)
No comments:
Post a Comment