ငှက်တစ်အုပ် ဟိရေ ...
လွတ်မြောက်ရီးငှက်တိ ပ
ယင်းငှက်တိမှာ သမိုင်းသစ်ကို ပျံသန်းဖို့ ခံယူချက်တစ်ခုစီပါကတ်တေ
ကောင်းကင်ဆန်ရေ သခြင်းတိကို သံပြိုင်သီကျူးလို့ 
ယင်းငှက်တိ ယေ
မြင့်မြင့်ပျံတက်ဖို့  တောင်ပံတိကိုလည်း ပြပြင်းထထန် ဝှိ့ ယမ်းနိန်ကတ်ယင့်။
အုပ်စုဖွဲ့  ညဇာသားတိမှာ
လှောင်အိမ်ဆန်ရေ သူရို့ မွီးရပ်မြီအကြောင်း
ဥခွံခတ်မာမာထဲမှာ ပိတ်မိနိန်သိမ့်ရေ သူရို့ မျိုးနွယ်တိအကြောင်း
သမိုင်းအဆက်ဆက် လွတ်လပ်စွာမပျံသန်းနိူင်ခရေ သူရို့ သက္ကရာဇ်တိ အကြောင်း
ငှက်ဆန်ဆန်သူရို့ စကားဝိုင်းက လွတ်မြောက်မှုအာသီသတိအပြည့်
သူရို့ ရေ မုန်တိုင်းခရီးကြမ်းအတွက်လည်း ပျံသန်းဖို့ အသင့်ဖြစ်နိန်ကတ်တေ။
သူရို့ တိရေ သူရို့ အနာဂတ်အတွက် ဖီးနစ်ငှက်တိ ဖြစ်ကတ်တေ
သူရို့ တိရေ သူရို့ အချင်းချင်းအတွက် အောက်ချင်းငှက်တိဖြစ်ကတ်တေ
သူရို့ တိရေ ရန်သူအတွက် ဝံလက်ငှက်တိ ဖြစ်ကတ်တေ
ပျံသန်းခြင်းနန့် ဘဝကိုပေါင်းစပ်လို့ 
တာတို တာရှည် အုပ်လိုက်ပျံကတ်ဖို့  သူရို့ အားမာန်
သူရို့ မြီစွာ သူရို့ ပျံသန်းခြင်းအတွက် ကဗျည်းအက္ခရာတိထွင်းထုလို့ ဟိနိန်လီရေ။
ငှက်တစ်အုပ် ဟိရေ
တော်လှန်ရေး ငှက်တိ ပ
လွတ်မြောက်ခြင်းတေးသံတိ သံပြိုင်သီကျူးကတ်တေ
လှောင်အိမ်ကမ္ဘာအတွက် ကမ္ဘာမကျေအလံတိ လွင့်ထူကတ်တေ
ယင်းငှက်တိ ယေ
သမိုင်းသစ်ခရီးကို ပျံထွက်ထိုးဖောက်ဖို့ 
သူရို့ တောင်ပံတိကိုလည်း တဘြုန်းဘြုန်းခတ် ဝှိ့ ယမ်းနိန်ကတ်ယင့် ဝေ။
ခိုင်ရမ္မာ(၁၀/၀၃/၂၀၁၃
No comments:
Post a Comment