မပြည့်စုံမှုတိ များလွန်းရေ ဘဝမှာ

မပြည့်စုံမှုတိ များလွန်းရေ ဘဝမှာ
ရောင့်ရဲတင်းတိန်ခြင်းဆိုစွာ 
ဒဏ်ရာ တစ်ခု ဖြစ်နိန်ဖို့လား
မျိုးရိုးဗီဇနန့် ပြောင်းပြန်အချိုးကျရေ
ဝပ်တွားခယခြင်း အတတ်ပညာ
ပြည်ပဖြစ်လို့ ထပ်ကွင်းမောင်းကွင်းချေနန့်မလား
နေ့တဓူဝ အလိုမကျမှုတိက 
ရီတခွန်ပိုင် ဒလဟောစီဆင်း
ယင်းမြစ်စွာ ... ဇာထိအောင်လဲ ဝေ

ခုနှစ်သက္ကရာဇ်တိက
ထောင်ခြံတိပိုင် တစ်ထပ်ပြီးကေ တစ်ထပ်
ဇာတ်တူသား ဝံလက်တိ
မဲတူးနိန်ရေ ကျကန်းတိ
ဒေါင်းတောင်တိ တကိုယ်လုံးနန့် ငှက်ဇာတ်ပျက်တိ
ထွီးရောယှက်တင်
ရုန်းထွက် လွတ်မြောက် ပျံသန်းဖို့
ထွက်ပေါက် မဟိဗျာယ်လား ဝေ

ကျိန်စာသင့် စာမျက်နှာထက်မှာ
အုပ်ပြိုတိ ထိုတစ်စု
အသိမ်းပိုက်ခံလိုက်ရရေ ဘုရားတစ်ပါး
အနာဂတ်တိ ရာသီတိုင်း အညွန့်ချိုးခံနိန်ရယင်း
ပုစ္ဆာအားလုံး အဖြေအားလုံးကိုပင် ငါရို့ အလွတ်ရနိန်ကတ်ဗျာယ်
ဘဝတိလည်း ရိုးအီဖျော့တော့
စိုက်ပျိုးယင်း သီဆုံး
သီဆုံးယင်း ထပ်စိုက်ပျိုးနိန်ကတ်ရဖို့
မြီနိန်ရာ တစ်ခုမှာ
ငါရို့ စွာလည်း သစ်ပင်တစ်မျိုးဆက် ဖြစ်လာကတ်ဖို့သိမ့်ရာ

မပြည့်စုံမှုတိ များနိန်သိမ့်ရေ ဝေ
ဟိမဲ့ စုမဲ့ ခွန်အားဆန္ဒတိကို ထုတ်ပိုးစုပုံ
လုံးဝမလဲသိမ့်ရေ အမျိုးသားအလံတော်အောက်မှာ
ငါရို့ အားလုံး ညီညီညာညာ
စည်းလုံးခြင်း
အနစ်နာခံခြင်း
မျိုးချစ်ခြင်း
ငါရို့ ဧ့ နုပျိုခြင်းလက်ချောင်းတိနန့် ခေတ်အသွီးအသားကို မလွတ်တမ်း ဆုပ်ကိုင်ကတ်မေ

အချိန်ကောင်း အခါကောင်း
အခွင့်အရေးတိ နှောင်းမလားခင်
ငါရို့ တိ တာထွက်မျဉ်းနားကို ရောက်အောင်လားကတ်မေဖိ ...